Presidenti turk Rexhep Tajip Erdogan ka thënë se “nëse është e nevojshme”, Ankaraja mund të mbyllë dy baza në Turqi, ku janë vendosur trupat amerikane.
“Ne do të flasim me të gjitha delegacionet tona dhe, nëse është e nevojshme, mund të mbyllim Incirlik (një bazë ajrore në provincën jugore të Adana) dhe Kurecik (një stacion radari në provincën lindore të Malatias)”, tha Erdogan në një intervistë televizive.
Duke folur për rezolutën e miratuar në Senatin e SHBA për pretendimet armene të ngjarjeve të vitit 1915, Erdogan tha se projekt-ligji ishte “plotësisht politik”, duke shtuar:
“Eshtë shumë e rëndësishme për të dy palët që Shtetet e Bashkuara të Amerikës të mos ndërmarrin hapa të pakthyeshëm në marrëdhëniet tona. Na vjen keq që polarizimi në politikën e brendshme të SHBA ka pasur pasoja negative për ne dhe që disa grupe po keqpërdorin zhvillimet në vendin tonë për interesat e tyre në mënyrë që të dobësojnë Presidentin Donald Trump”.
Senati i Kongresit të Shteteve të Bashkuara i udhëhequr nga republikanët miratoi të enjten një rezolutë që njeh ngjarjet me armenët në fillim të shekullit të 20-të si “genocid”.
Turqia kundërshton portretizimin e ngjarjeve si “genocid” dhe i përshkruan ato si një tragjedi në të cilën të dy palët pësuan viktima. Ankaraja ka propozuar në mënyrë të përsëritur krijimin e një komisioni të përbashkët të historianëve nga Turqia dhe Armenia, si dhe ekspertë ndërkombëtarë për të shqyrtuar çështjen.
Në një intervistë, Erdogan gjithashtu iu referua Mesdheut lindor, për të cilin ai tha se ka rezerva të konsiderueshme me hidrokarbure, dhe njoftoi se Turqia në rajon mund të punojë me kompani që janë të forta ndërkombëtarisht.
Ai theksoi se Memorandumi e Mirëkuptimit mes Turqisë dhe Libisë, i mbështetur nga Kombet e Bashkuara, do të hyjë në fuqi pas ratifikimit nga Parlamenti.
“Nëse qeveria libiane kërkon mbështetje ushtarake, Turqia do të marrë vendimin e saj. Turqia është e gatshme t’i sigurojë Libisë të gjitha llojet e mbështetjes. Ne mund të ndërmarrim hapa në përputhje me ligjin ndërkombëtar”, tha Erdogan.
Më 7 nëntor, Turqia dhe qeveria libiane me qendër në Tripoli, nënshkruan dy memorandume të veçanta, një mbi bashkëpunimin ushtarak dhe tjetri mbi kufijtë detarë të vendeve të Mesdheut lindor.
Erdogan tha gjithashtu se qëllimi i Turqisë është të ruajë paqen për sirianët në një operacion antiterror në veri të Sirisë, jo të “përdorë naftën e saj”.
“As SHBA dhe Rusia nuk kanë arritur të eleminojnë trupat e YPG / PKK atje, siç u premtua. Pra, ne duhet ta bëjmë atë”, shtoi presidenti turk.
Ai theksoi se lufta kundër luftëtarëve të PKK duhet të zhvillohet bashkërisht, si dhe ajo ndaj luftëtarëve të ISIL-it. /tesheshi.com/
