Fenerbahçe, Fenerbahçe, Fenerbahçe!
Në Euroleague ka një skuadër të re kampione: është Fenerbahçe!
Finalja e Euroleague-s, në “Sinan Erdem” të Stambollit: Fenerbahçe 80-64 Olimpiakos!
Për herë të parë kupa e Euroleague-s fitohet nga një skuadër turke, nga më e mira e këtyre viteve në Turqi.
Dominimi i plotë ndaj Olimpiakosit në finalen e mbrëmjes së kësaj të diele. Bogdan Bogdanovic dhe Nikola Kalinic ishin shënuesit më të mirë për turqit, me nga 17 pikë, por Ekpe Udoh edhe një herë tjetër qe më vendimtari.
Amerikani shënoi dhjetë pikë, ama loja në mbrojtje e tij qe fantastike. Udoh u shpall dhe lojtari më i vlefshëm i finaleve, Final Four MVP.
Dhjetëminutëshi i fundit qe më shpërthyesi i finales, me Fenerbahçen që e çoi gjer në 20 pikë diferencën me Olimpiakosin. Për grekët, zhgënjyes qe Spanoulis, lojtari kyç, aspak në formë. /tesheshi.com/
