Komisioni Zgjedhor i Egjiptit ka njoftuar se femrat me nikab nuk do të lejohen të votojnë në zgjedhjet parlamentare që zhvillohen këtë muaj.
Zëdhënësi i Komisionit Zgjedhor, Omer Mervan, ka mbajtur sot një konferencë shtypi, ku ka deklaruar se femrat me nikab do të duhet të zbulohen ose nuk do të lejohen të votojnë. Ai ka thënë se në qendrat e votimit do të ketë një kontroll të rreptë të identitetit të personave, gjë që do e bëjë të detyrueshëm zbulimin e fytyrës.
Ndërkaq, në zgjedhje nuk mungojnë dhe kandidatet me nikab, që i përkasin partisë en-Nur. Burimet të kësaj partie kanë bërë të ditur se ato nuk kanë për t’u shfaqur në mjetet e informimit.
Zgjedhjet e ardhshme do të mbahen në dy raunde. Ato nisin më 18-19 tetor, ndërsa një raund i dytë votimi do të jetë një muaj më vonë, më 22-23 nëntor.
Javën e shkuar qe Universiteti i Kajros, një prej institucioneve më të vjetra të arsimit të lartë në Egjipt, që habiti me një vendim pak a shumë të ngjashëm. Kështu, sipas vendimit, lektoret nuk do të lejohen të mbajnë nikab.
Drejtuesit e universitetit e justifikuan masën e marrë me arsyetimin se kërkonin të rrisnin nivelin e komunikimit mes studentëve dhe mësimdhënësve të tyre, si dhe për ta përmirësuar procesin arsimor. /tesheshi.com/
