Gara e fundit e këtij kampionati në Formula 1, ajo e Abu Dhabit në nëntor, do të shënojë përfundimin e karrierës së Felipe Massa-s.
Braziliani e ka lajmëruar ditën e sotme largimin nga Formula 1. “Ky do të jetë sezoni im i fundit në Formula 1,” ka deklaruar ai.
Massa e ka çmuar mbarimin e këtij kampionati si kohën e duhur për t’i dhënë fund karrierës 15-vjeçare në Formula 1.
Ai zgjodhi ta bëjë të ditur lajmin në Monza, në të njëjtin vend ku Michael Schumacher lajmëroi tërheqjen e tij të parë nga garat e F1-shit dhjetë vite të shkuara.
“Zgjodha këtë vend për të lajmëruar vendimin tim sepse dhjetë vite më parë Michael-i njoftoi tërheqjen e tij, dhe e vetmja mënyrë e imja për të vazhduar te Ferrari ishte që ai të ndalonte.”
Për 35-vjeçarin, gara e Abu Dhabit do të jetë e 250-ta në karrierën e tij. Ai ka pilotuar për Sauberin, për Ferrarin e Uilliamsin.
Massa e bëri debutimin në vitin 2002, në Australi, për të dalë i pari në 11 gara gjatë këtyre viteve. 16 nisje nga vendi i parë numëron ai, e 41 ngjitje në podium. Ai do ta humbiste për një pikë titullin në vitin 2008, ndërkohë që në sezonin pasues, në provat zyrtare të garës së Hungarisë, do t’i mbijetonte mrekullisht një goditjeje në kokë nga një pjesë e një makine para tij. Massa nuk do të pilotonte më atë sezon, me karrierën e tij në tatëpjetë të ngadaltë në vitet në vazhdim.
Në 2014-tën, ai iu bashkua Uilliamsit, skuadër për të cilën piloton ende. /tesheshi.com/
