Kthimi i 36-vjeçarit zvicerian në krye të klasifikimit botëror të tenistëve meshkuj u paralajmërua që me fitoren në Australian Open.
Ishte thjesht çështje kohe se kur Roger Federer do të ulej në fronin e numrit një, përforcuar nga fakti se Rafa Nadal rihyri në një cikël dëmtimesh, që nuk i mundësuan as t’i shkonte gjer në fund turneut të parë Grand Slam të vitit.
Fitorja 2-1 në çerekfinalet e turneut të Roterdamit ndaj holandezit Robin Haase i ka hapur rrugën Federer-it që të hënën, kur të përditësohet klasifikimi botëror, ai të zëvendësojë Nadalin në kryesimin e ATP-së.
Roger Federer hyn kështu në histori, duke u bërë tenisti më i vjetër në moshë që merr vendin e parë në klasifikimin botëror.
Kjo është një ripërsëritje e sukseseve të tij, pasi Federer do të bëhej më së pari numri një në botë në vitin 2004. Një pozitë të cilën arriti ta mbante për 302 javë, 237 nga të cilat qenë të njëpasnjëshme.
Federer thyen me këtë sukses rekordin e Andre Agassi-t; tenisti amerikan do ta meritonte numrin një në botë në moshën 33-vjeçare, gjatë vitit 2003. /tesheshi.com/
