Roxher Federer nuk po ndalet më. 36-vjeçari fitoi të dielën edhe turneun e “shtëpisë”, në Bazel të Zvicrës, duke mundur një prej tenistëve më në formë të momentit, Huan Martin Del Potro, 2-1 me sete.
Forcës së argjentinasit, Federer iu përgjigj me goditje klasi e me lojë intensive. Seti i parë u fitua nga Del Potro me tie break, 7-6, pasi Federer shpërdoroi disa topa decizivë.
Por në setin e dytë, numri 2 i botës, arriti të thyejë argjentinasin me shërbimet e tij, nën një entuziazëm të pashoq të spektatorëve.
36-vjecari e fitoi 6-4 setin e dytë e më pas, i çliruar edhe nga presioni i të qenit “djali i shtëpisë”, shpërtheu me një lojë energjike e gjuajtje të sakta.
E seti final nuk kishte shumë histori, pasi Mbreti Roger sic e thërrasin të gjithë, theu shërbimet e kundërshtarit dhe nuk gaboi të vetat, duke fituar 6-3.
Në këtë mënyrë, Federer e fiton për herë të 8-të turneun e Bazelit, një tjetër rekord më vete ky për zviceranin, që me kalimin e viteve, po shfaq ende një lojë fantastike, duke u kthyer çdo ditë e më shumë, një legjendë e gjallë që ecën, që fiton, që luan bukur, që argëton, që ngre trofe…e që qan tek secili. /tesheshi.com/
