Zëvendësministri i Jashtëm i Rusisë, Sergei Ryabkov, ka dhënë sot një konferencë shtypi, ku ka lënë të kuptohet se Siria mund të ketë një model federal në të ardhmen, diçka që prej kohësh po qarkullon si një ide.
“Nuk mund t’i vlerësoj mundësitë e krijimit të një shteti federal në Siri, sepse procesi i tillë nuk ka nisur ende,” ka thënë Ryabkov, por pa e përjashtuar mundësinë e një zhvillimi kësisoj.
Sipas zëvendësministrit, Rusia beson se palët në bisedimet e paqes për Sirinë mund të vijnë tek ideja e krijimit të një republike federale nëse kjo zgjidhje i lë të kënaqura të tëra ato.
“Nëse si rezultat i diskutimeve dhe konsultimeve mbi të ardhmen e Sirisë, palët arrijnë në përfundimin se modeli i tillë është i nevojshëm për ta mbajtur Sirinë të bashkuar, shekullare, të pavarur dhe sovrane, atëherë, kush mund ta kundërshtonte këtë?”
Beshar Esadi nuk e pati përjashtuar po ashtu në një intervistë shtatorin e shkuar idenë e një shteti federal.
Po qe se ndërprerja e luftimeve, aktualisht në fuqi, nuk jep rezultatet e duhura, e nëse bisedimet e paqes të parashikuara të rinisin më 7 mars nuk shkojnë siç duhet, një plan B për zgjidhjen e krizës siriane merr parasysh dhe një ndarje të Sirisë. /tesheshi.com/
