Dueli Erion Veliaj – Fatos Nano duket se vazhdon sërish, edhe pse ish-kryesocialisti e ish-kryeministri është larguar me kohë nga protagonizmi politik e publik.
Bashkia e Tiranës ka njoftuar së fundi se shtetasi Fatos Nano nuk i bindet aktit administrativ për të liruar ambientet e zëna padrejtësisht prej vitesh në stadiumin “Selman Stërmasi”.
“Pasi është njoftuar për prishjen e kontratës për shkak se ambienti nuk shfrytëzohej për qëllimin për të cilin ishte marrë, çifti Nano me Joy Travel dhe restorant ‘Pulëbardhën’ i janë drejtuar gjykatës për të kundërshtuar vendimin e marrë nga Bashkia e Tiranës. Ky është një nga rastet më flagrante kur një ish-kryeministër refuzon të lirojë pronën publike të qytetarëve, të cilën e ka zënë prej vitesh dhe e përdor për bizneset e tij private”, sqaron bashkia në komunikatë.
Sipas institucionit të drejtuar nga Erion Veliaj, hapësira e liruar do përdoret për parkim publik, por ja që të vetmet që nuk lirohen janë ato të zëna nga Fatos Nano.
Sakaq, mësohet se Fatos Nano dhe bashkëshortja e tij kanë hedhur në gjyq bashkinë e kryeqytetit.
Mund të jetë dhe koiçidencë, por parë në kohë, ky është një rikthim i duelit të vjetër mes të dyve që në fakt nuk është se ka qenë i drejtpërdrejtë.
Thjesht, Erion Veliaj dhe MJAFT-i tij u faktorizuan politikisht në periudhën e qverisjes së Nanos duke i bërë një oponencë të fuqishme asaj, por dhe duke e shpotitur jetën e tij private me sajimin e një dasme në oborrin pranë Piramidës dhe afër Kryeministrisë.
Madje në një segment militant të PS-së dhe strukturave të saj, Erion Veliaj konsiderohet si shkaktari kryesor i rrëzimit të socialistëve nga pushteti më 2005-ën, apo më saktë Fatos Nanos. /tesheshi.com/
