Ministri i Brendshëm, Fatmir Xhafaj deklaroi sot para Komisionit Parlamentar të Sigurisë se SHBA dhe BE kanë alokuar buxhet shtesë për Ministrinë e Brendshme, i cili do të përdoret për blerjen e pajisjeve të fundit për t’u vënë në dispozicion të Task Forcë-s për Luftën Kundër Krimit
Xhafaj tha se do të jenë rreth 21 miliardë lekë në dispozicion të Policisë së Shtetit dhe strukturave të tjera të sigurisë në Ministrinë e Brendshme, që mund të shtohet nëse llogaritet edhe ndihma e partnerëve ndërkombëtarë.
“Buxhetin nuk e kemi parë si çështje numrash, por si çështje prioritetesh. Do të ketë buxhet shtesë për Ministrinë e Punëve të Brendshme nga vendet partnere të Bashkimit Europian dhe Shtetet e Bashkuara”, tha Xhafaj para Komisionit.
Ministri theksoi se në Task Forcë do të përfshihet edhe Shërbimi Informativ Shtetëror.
“Aktualisht në mjedist e ministrisë janë akomoduar ekspertë të FBI, eksperti i parë mbërriti dje të tjerët do të vijnë në ditët në vazhdim. Jemi në diskutim për termat e referencës. Eksperti i Ministrisë së Brendshme të Gjermanisë ka filluar punë dhe është akomoduar në Ministrinë e Brendshme. Dy ekspertë që do të caktojë ministri i Brendshëm i Italisë shpresojmë të vijnë së shpejti. Ajo çfarë kemi hartuar me një vendim të posacëm të qeverisë dhe ajo çfarë është duke punuar me ekspertët do të japin efektet rezultatet e shumëpritura”, tha Xhafaj. /tesheshi.com/
