Nga opozita në Shqipëri është dhënë më së fundi dhe i pari opinion lidhur me “Platformën e Tiranës”, një pakt mes partive shqiptare në Maqedoni, nënshkruar në zyrën e kryeministri Rama menjëherë pas zgjedhjeve të 11 dhjetorit në shtetin fqinj.
“Një budallallëk” e ka cilësuar kreu i republikanëve Fatmir Mediu, gjatë një debati në Top Story.
Në fakt, temë qendrore ishte ajo çfarë po ndodh në politikën shqiptare, por për një moment u përmend dhe platforma e njohur e nxjerrë si shkak nga pushteti aktual maqedonas për të mospranuar qeverinë e re, me bazë një aleancë paszgjedhore mes LSDM-së dhe BDI-së.
Cilësimi “budallallëk nga ana e Mediut u prit jo mirë nga një pjesë e panelit, ku ishte analisti Skënder Minxhozi ai që tha se “Platforma” e Tiranës ishte thjesht një ripotencim i Marrëveshjes së Ohrit.
Debati rreth kësaj teme nuk zgjati shumë, ishte vetëm një fraksion sekondash; por me gjasë Mediu nuk kontestoi platformën dhe përmbajtjen e saj por mënyrën se si Rama e prezantoi atë.
Dhe duke gjykuar nga ajo ç’po ndodh, ku pakti i partive politike maqedonase hartuar në Tiranë, ka si foto kryesore atë dalë në zyrën e Ramës dhe me të në mes, gjë e cila e ka kompromentuar në rrafshin politik, mungesa e një urtësie politike në këtë rast është e dukshme.
Marrëveshja mund të ishte bërë, edhe nën diktatin e Ramës, por paraqitja fotografike mund dhe duhej të ishte kursyer. /tesheshi.com/
