Edhe pas 18 vjetësh nga përfundimi i luftës në Kosovë ende vazhdojnë përpjekjet për zbardhjen e fatit të 1665 personave të zhdukur. Një përpjekje më e fundit u bë ditë më parë në gërmimet që u bën në Kizhevak të Serbisë, por rezultuan pa sukses.
Duke pranuar në një mënyrë dështimin e institucioneve për zgjidhjen e kësaj çështje tejet të ndjeshme, drejtori i Departamentit të Mjekësisë Ligjore, Arsim Gërxhaliu, e sheh të domosdoshme të bëhet trysni tek miqtë ndërkombëtarë për t’u përshpejtuar ky proces, pasi thotë se pengesat e Beogradit janë të vazhdueshme.
“Është më se e nevojshme që të bëhet një trysni edhe e miqve ndërkombëtar në këtë aspekt për shkak të përshpejtimit të procesit, për shkak se dita-ditës edhe familjarët kanë filluar të na vdesin, dhe thjesht të them në thonjëza kemi edhe si një rënie në provim. Fajin për mosdhënien e informacioneve të sakta të varrezave masive serbet ia lënë kohës 18-vjeçare, ndërrimit të konfiguracionit…”, ka thënë ai, në një intervistë për “Ekonomia Online”.
Gërxhaliu më tej shton se mbetet në dorë të prokurorit serb nëse do të japë urdhëresën për të kërkuar fotografitë, apo pamjet satelitore të kohës së luftës, pasi për territorin e Serbisë duhet që pala serbe të bëjë këtë kërkesë. /tesheshi.com/
