Dy amerikanë që po luftonin me forcat ukrainase në veri të Kharkiv janë zhdukur për gati shtatë ditë dhe ekziston frika se trupat ruse i kanë kapur, pretendojnë familjet e tyre dhe një shok, raporton CNN.
Ata janë Alexander John Robert Drueke, 39 vjeç nga Tuscaloosa, Alabama dhe Andy Tai Ngoc Huynh, 27 vjeç, nga Hartsele, Alabama.
Rreshteri i ekipit, i cili dëshironte të mbetej anonim për arsye sigurie, i dha CNN fotografitë e pasaportave të të dy burrave dhe vulat e tyre që i lejonin ata të hynin në Ukrainë.
Drueke dhe Huynh, tha ai, u zhdukën gjatë betejës dhe asnjë gjurmw nuk u gjet gjatë kërkimit të mëvonshëm. Një postim në një kanal propagandistik rus në Telegram pretendonte se dy amerikanë ishin kapur pranë Kharkivit.
“Ishte kaos absolut,” tha ai për CNN. “Më shumë se njëqind këmbësorë përparuan në pozicionet tona. Ne kishim një tank T-72 që gjuante njerëzit nga një distancë prej 30, 40 metrash,” shtoi ai.
Bunny Drueke, nëna e Aleksandrit, tha për CNN se “ata janë të supozuar të burgosur lufte, por kjo nuk është konfirmuar”.
Ajo tha se ambasada e SHBA-së në Ukrainë nuk mund të verifikonte nëse djali i saj ishte kapur.
“Ata nuk kanë qenë në gjendje të konfirmojnë se ai është te rusët. Gjithçka që mund të kontrolloj është se ai është në listë si i zhdukur për momentin,” tha ajo. “Ata janë në kontakt të ngushtë me mua dhe jam plotësisht e bindur se po punojnë për rastin”, shtoi ajo.
“Për momentin nuk duam të hamendësojmë se çfarë mund të ketë ndodhur. Natyrisht ka disa skenarë. Njëri prej tyre është se ata mund të jenë kapur. Por ne nuk kemi asnjë konfirmim për këtë për momentin,” tha e fejuara e Huynh, Joy Black. Familjarët kanë konfirmuar se për herë të fundit janë dëgjuar me të zhdukurit më 8 qershor, kur u është thënë se do të jenë jashtë linje për disa ditë për shkak të misionit.
Një zëdhënës i Departamentit të Shtetit tha se ata ishin “në dijeni të raporteve të pakonfirmuara të dy shtetasve amerikanë të bllokuar në Ukrainë”.
“Ne po monitorojmë nga afër situatën dhe jemi në kontakt me autoritetet ukrainase”, tha zëdhënësi. “Për arsye privatësie, nuk kemi komente të mëtejshme.” /tesheshi.com/
