Familjarët e të vrarëve në Kanada: Komuniteti i gjerë për të kundërshtuar islamofobinë

Familjarët e familjes muslimane të vrarë në Ontario të Kanadasë, i bënë thirrje komunitetit më të gjerë aty për të kundërshtuar racizmin dhe islamofobinë, pasi policia përcaktoi se i dyshuari për vrasjen ishte i motivuar nga urrejtja.

Katër anëtarë të familjes të cilët u vranë të dielën kur vrasësi, një 20-vjeçar në timonin e një minibusi, i goditi ata në trotuar, janë: Salman Afzaal, 46 vjeç, gruaja Madiha, 44 vjeçe, Yumna Afzaal, 15 vjeçe dhe nëna e Salman, 74 vjeçe.

Një djalë 9-vjeçar është ende në spital me dëmtime serioze, por që nuk janë kërcënuese për jetën, njoftoi Reuters.

Nathaniel Weltman, 20 vjeç, është në paraburgim dhe dyshohet për katër akuza për vrasje të shkallës së parë dhe vrasje në tentativë.

Familjarët e viktimave kundërshtuan raportin origjinal të policisë, i cili deklaroi se i dyshuari nuk ishte anëtar i ndonjë grupi ekstremist dhe se ai nuk kishte asnjë bashkëpunëtor.

“I riu që kreu aktin terrorist u ndikua nga grupi me të cilin ai ishte i lidhur dhe pjesa tjetër e komunitetit duhet të marrë një qëndrim të vendosur kundër gjithë kësaj,” tha familja, por nuk bëri të ditur emrin e grupit ose se si ata mësuan i dyshuari ishte i lidhur me të.

Anëtarët e familjes që u vranë erdhën në Kanada nga Pakistani në 2007, sipas mediave lokale.

“Zemrat tona janë thyer, gojët tona pa fjalë”, tha Abd Alfatah Twakkal, udhëheqësi i komunitetit musliman të zonës.

“Në të njëjtën kohë, ka ankth dhe një ndjenjë frike, për shkak të këtij akti të tmerrshëm …”

Twakkal tha se kanë marrë mbështetje të jashtëzakonshme dhe mesazhe solidariteti, gjë që jep një ngushëllim. Por ai bëri thirrje për veprime konkrete për të adresuar islamofobinë në rritje që shpesh përhapet në mediat sociale.

Agjencia e Statistikave të Kanadasë tha në mars se policia kishte raportuar 181 incidente në 2019 që synonin myslimanët, një rritje e lehtë nga periudha e mëparshme.

 “Nuk është e mjaftueshme të thuash vetëm se ne e refuzojmë Islamofobinë, ne e kundërshtojmë ksenofobinë, ne e hedhim poshtë racizmin, diskriminimin,” tha Twakkal. /tesheshi.com/