Për Atletikon e Madridit mund të kishte shkuar shumë ndryshe historia në derbin madrilen në “Santiago Bernabeu” ndaj Realit nëse Oblak nuk do të bënte një numër pritjesh shpëtimtare.
Derbi i Madridit u mbyll këtë pasdite 1-1, me golat e shënuar respektivisht për Realin dhe Atletikon nga Ronaldo e Griezmann në pjesën e dytë.
Reali do të kishte një kontroll thuajse të plotë të lojës, por të konkretizuar vetëm me një gol.
Njeriu i ndeshjes ishte portieri i Atletikos, Jan Oblak, sipas faqes elektronike të Eurosport-it.
“Slloveni është shndërruar në një prej portierëve më të mirë në futbollin europian përgjatë viteve të fundit, dhe ky ishte një tjetër demonstrim i shkëlqimit të Oblak-ut. Të mos ishte për 25-vjeçarin, Reali i Madridit do të kishte marrë tre pikë në këtë ndeshje,” deklaron Eurosport.
Të njëjtin mendim ndan dhe e përditshmja sportive spanjolle Marca, që shkruan, “Një paraqitje e jashtëzakonshme nga portieri Jan Oblak e ndihmoi Atletikon e Madridit të merrte një barazim ndaj Realit…”
Rezultati i la të dy skuadrat në të njëjtat pozita në klasifikimin e La Ligës. Atletiko ruan diferencën prej katër pikësh ndaj Realit, në vend të dytë e të tretë. /tesheshi.com/
