Pikat e karburanteve janë shndërruar në shënjestrën e preferuar të grabitësve. Dhe për këtë arsye, ministri i Rendit, Saimir Tahiri, duke ndjekur tezën e shefit të tij, Rama sipas së cilit fajin e ka sistemi dhe jo njeriu, u ka ofruar disa propozime drejtuesve të pikave të karburanteve gjatë një takimi me ta, se si të mbrohen nga hajdutët, duke ndryshuar pikërisht sistemin. Sipas kreut të Rendit, ata duhet të instalojnë kamera dhe ç’është më kryesorja, duhet të eliminojnë furnitorin dhe paranë kesh që ai merr nga konumatori.
“Tirana ka parametra më të lartë sigurie, krahasuar me qytetet e tjera. Për shembull nëse kemi pika karburanti elektronike, ku gjatë orëve të natës nuk do kemi operatorë njerëz që punojnë aty, por pika karburanti automatike, kemi hequr nga dora e krimit një mundësi ku të sulmojë. Kjo ndihmon edhe biznesin. Është kjo arsye që ne kemi hapur këtë dritare komunikimi lidhur me hapat që mendon Policia se duhet të ndërmerrni. Në këtë drejtim janë dhe kamerat e sigurisë, që dekurajojnë grabitësit për të kryer vjedhje në këto pika karburanti”, tha Tahiri.
Ndërsa për pikën tjetër të ndjeshme të këto propozimeve, kostot financiare pra të ndryshimit të sistemit, Tahiri se është i gatshëm të diskutojë me bizneset për gjetjen e hapësirave bashkëpunuese dhe në këtë drejtim: “Unë mendoj se ka ardhur koha që të bëjmë një investim të vogël sot për më shumë siguri nesër. Një sakrificë e vogël sot për të mënjanuar hallet nesër. Jemi të hapur për një bisedim transparent me ju”, shtoi ministri i Rendit.
Pak ditë më parë, një i ri që vidhte karburante në seri u kap nga polcia. Dhe pas “heqjes së maskës”, rezultoi të ishte një punonjës garde, siç u tha, për momentin në “periudhë prove”. /tesheshi.com/
