Në ditën më të mirë të kokëkuqes, në të parën garë pas nëntë vitesh që dy pilotët e Ferrari-t nisen të parët në një garë, gjendet një finlandez për t’ua prishur festën.
Valtteri Bottas ka bërë një shkëputje të mrekullueshme me Mercedes-in e tij në startin e Çmimit të Madh të Rusisë, duke mos e lëshuar vendin e parë gjer në fundin e garës. Finlandezi ka fituar kështu të parën garë në karrierën në Formula 1.
Vettel e Raikkonen, në ndjekje të tij, kanë bërë çfarë kanë patur në dorë, por asnjë përpjekje nuk ka dhënë rezultat, as një strategji nuk ka rezultuar frytdhënëse.
Një garë ku Lewis Hamilton ka mbetur për herë të parë pas shumë kohësh jashtë podiumit, si për të treguar se humbja e titullit sezonin e shkuar ishte veç fillimi i telasheve për të.
Në Soçi është parë një Fernando Alonso që e lë garën në mënyrë demontrative pa nisur mirë; do të tërhiqej gjithashtu dhe Ricciardo, me Red Bull-in sot krejtësisht në hije.
Makina e sigurisë e futur në pistë do të prishte ritmin, për të mos u parë më tutje parakalime, por vetëm ndjekje në distancë të rivalëve.
Në dhjetëshen e parë do të renditeshin Bottas, Vettel, Raikkonen, Hamilton, Verstappen, Perez, Ocon, Hulkenberg, Massa dhe Sainz.
Fitorja e Bottas-it e fut dhe atë në lojën për titull, ndërsa kryesimin e mban Vettel me 86 pikë. Hamilton vjen i dyti, me 73 pikë; dhjetë pikë më pak, 63, ka Valtteri Bottas. /tesheshi.com/
