Sebastian Vettel është i papërmbajtshëm në këtë fillim të sezonit në Formula 1. Fitorja në Australi është shoqëruar me një tjetër në Bahrejn, që e ngjit gjermanin në kuotën e 50 pikëve të plota në klasifikimin e pilotëve.
Vettel i bëri një mbyllje fantastike garës së sotme në Bahrejn, pasi kishte kryesuar gjatë gjithë saj. Gomat e konsumuara fort në dhjetë xhirot e fundit i sollën Bottas-in fare pranë, aq sa në finish largësia mes tyre ishte 0.6 sekonda, si asnjëherë më parë në historinë e këtij Çmimi të Madh.
Hamilton u ngjit në podium si fitues i vendit të tretë; fund i mirë për të po të kihet parasysh nisja nga vendi i nëntë.
Raikkonen e la garën pas një incidenti gjatë ndërrimit të gomave. Dy pilotët e Red Bull-it, Ricciardo dhe Verstappen, u tërhoqën gjithashtu që në fillim të garës, me probleme në makinat e tyre.
Befasia qe Pierre Gasly, piloti i Toro Rosso-s, i cili u rendit i katërti, pas treshes fituese. /tesheshi.com/
