Organizata Botërore e Shëndetësisë (OBSH) paralajmëroi vitin e kaluar për rënien e përdorimit të prezervativëve tek adoleshentët në Evropë, gjë që rrit rrezikun e IST-ve dhe shtatzënive të padëshiruara.
Të dhënat më të fundit nga Qendra Evropiane për Parandalimin dhe Kontrollin e Sëmundjeve (ECDC) zbulojnë një rritje alarmante të rasteve të infeksioneve seksualisht të transmetueshme (IST) në të gjithë Evropën, me sifilizin dhe gonorrenë që regjistrojnë rritje dramatike.
Sipas raportit, numri i rasteve të konfirmuara të gonorresë në Evropë në vitin 2023 arriti në pothuajse 100,000, duke përfaqësuar një rritje prej 31 për qind në krahasim me vitin 2022 dhe deri në 300 për qind më shumë se në 2014. Kjo është gjithashtu shkalla më e lartë e regjistruar që kur ECDC filloi mbikëqyrjen e IST në 2009.
Një shqetësim edhe më i madh vjen nga rezistenca e gonorresë ndaj antibiotikëve. Shfaqja e shtameve rezistente ndaj ilaçeve po kërcënon efektivitetin e trajtimeve ekzistuese, paralajmëron ECDC. Numri i rasteve të sifilizit është gjithashtu në rritje – 40,000 raste u konfirmuan në vitin 2023, që është 13 për qind më shumë se në vitin 2022 dhe dy herë më shumë se në 2014.
Megjithëse klamidia mbetet IST bakteriale më e zakonshme në Evropë, të dhënat tregojnë një ngadalësim të rritjes së saj. Gjatë vitit 2023 janë regjistruar më shumë se 230,000 raste, që paraqet një rritje prej vetëm 3 për qind krahasuar me vitin 2022 dhe 13 për qind krahasuar me vitin 2014. Kjo e dhënë konfirmon tendencën e vitit 2022, kur numri i rasteve të gonorresë u rrit me 48 për qind dhe sifilizit me 34 për qind krahasuar me një vit më parë.
Ekspertët besojnë se testimi i shtuar mund të shpjegojë pjesërisht rritjen e rasteve, por ata gjithashtu theksojnë ndryshimet në zakonet seksuale, siç është përdorimi i reduktuar i prezervativëve, si një faktor domethënës. Organizata Botërore e Shëndetësisë (OBSH) paralajmëroi vitin e kaluar për uljen e përdorimit të prezervativëve tek adoleshentët në Evropë, gjë që rrit rrezikun e IST-ve dhe shtatzënive të padëshiruara, raporton Politico.
ECDC thekson se këto gjetje tregojnë për një nevojë urgjente për të rritur ndërgjegjësimin e publikut, për të forcuar masat parandaluese, testimin dhe trajtimin për të ndaluar përhapjen e këtyre infeksioneve të rënda. /tesheshi.com/
