Maratona e njëmbëdhjetë orë bisedimeve në Bruksel midis 19 ministrave të Eurozonës ka përfunduar me vendimin për të zhbllokuar 10.3 miliardë euro, si një hua e re për Greqinë.
Në të njëjtën kohë, Greqisë do t’i ofrohet lehtësimi i borxhit.
Një shumë prej 7.5 miliardë eurosh do të lëvrohet që në qershor, por pas disa masave në lidhje me pensionet dhe privatizimet.
Hap i madh përpara u cilësua marrëveshja sipas së cilës Eurozona pajtohet t’i ofrojë Greqisë lehtësim të borxhit në 2018-tën nëse kjo është e nevojshme për të përmbushur kriteret mbi barrën e pagesave.
Kjo arritje ka patur ndikim dhe në sigurimin e një marrëveshjeje nga ana e FMN-së për t’iu bashkuar përsëri Eurozonës në financimin e paketës së shpëtimit për Greqinë.
“Ne arritëm një përparim të madh mbi Greqinë, që na jep mundësi të hyjmë në një fazë të re në programin e ndihmës financiare greke,” u shpreh në një konferencë shtypi ministri holandez i Financave, e njëkohësisht presidenti i Eurogrupit, Jeroen Dijsselbloem.
Marrëveshja është mirëpritur nga ministri grek i Financave, Euclid Tsakalotos, që deklaroi se kjo do ta ndihmonte vendin e tij të dilte nga rrethi vicioz i recesionit. /tesheshi.com/
