Si të mos kishte mjaftuar incidenti i së martës me autobusin e Borusias së Dortmundit, një ngjarje që la në hije atë çka ngjau në fushë në Champions League të martën e të mërkurën, mbrëmë pasoi një tjetër incident i trishtë.
Një tjetër ndeshje e kësaj jave rrezikoi të shtyhej kur tifozët hynë në fushë në stadiumin e Lionit, aty ku skuadra vendase do të ndeshej me Beshiktashin, një ndeshje e vlefshme për çerekfinalet e Ligës së Europës.
Përplasjet e tifozerive përkatëse në shkallët e stadiumit, turmat e zbritura në fushë për t’i ikur dhunës,
ndeshja e shtyrë për 45 minuta, kaosi bashkëshoqërues…
Një tablo pikëlluese, që lë pak vend për futbollin e luajtur.
Nëse kthehemi te rezultatet e katër takimeve të së enjtes, tre prej skuadrave vendase ia dolën të shfrytëzojnë faktorin fushë dhe të fitojnë ndaj kundërshtarëve, ndërkohë që i vetmi ekip udhëtues i cili ishte pranë fitores e pësoi në fund, për të sjellë kështu dhe një barazim.
Fitorja më e pastër i përket Ajaksit, që fitoi 2-0 ndaj gjermanëve të Shalkes. Golat i shënoi i njëjti lojtar, Klaassen, njërin prej të cilëve me 11-metërsh.
Takimi me më shumë gola qe ai mes Selta Vigos dhe Genkut. Spanjollët i mposhtën 3-2 belgët; ishin këta të fundit që e hapën dhe e mbyllën serinë e golave.
Turqit qenë fitues ndaj francezëve në fushën e lojës gjer në minutën e 83-të. Babel kishte shënuar për Beshiktashin që në minutën e 15-të; një gol i zhvlerësuar prej gabimeve foshnjarake të mbrojtjes dhe të portierit. Tolisso e Morel realizuan në minutën e 83-të dhe të 84-t, për t’i dhënë kësisoj fitoren 2-1 Olimpikut të Lionit.
Mançester Junajtedi dukej se po kthehej me një fitore nga Brukseli, ku po ndeshej me Anderlehtin. Goli i armenit Mkhitaryan në pjesën e parë i kishte dhënë kryesimin, por jo sigurinë për suksesin. Paaftësia për ta kapitalizuar fitoren u pagua me barazimin zhgënjyes 1-1 pas një goli të belgëve pak para përfundimit të lojës. /tesheshi.com/
