Ndryshe pritshmërive, ekipet turke u kanë dhënë tonin ndeshjeve të dyta të playoff-it në Euroleague.
Basketbolli turk përfaqësohet me tre skuadra në playoff, si asnjë tjetër. Fenerbahçe, finaliste e sezonit të shkuar, është mes pretendentëve për fitimin e trofeut të Euroleague-s. Si e tillë, ajo e ka fituar dhe takimin e dytë në Athinë ndaj Panathinaikosit, 75-80, duke qenë vetëm një fitore larg kualifikimit për në Final Four. Fenerbahçe kryeson 2-0 në serinë e ndeshjeve ndaj Panathinaikosit.
Surprizë është fitorja e Darushafakasë në Madrid ndaj Realit. E zhvilluar mbrëmë, ndeshja ka përfunduar 80-84 në favor të turqve, që e çojnë në 1-1 rezultatin e përgjithshëm.
Fitore ka patur mbrëmë dhe për Anadollu Efesin, që pretendon të shkojë në Final Four për herë të parë pas shumë e shumë vitesh.
Mjaft e bukur përballja në Athinë ndaj Olimpiakosit mbrëmjen e së premtes, mbyllur me fitoren 71-73. Një ndeshje me shumë emocion, ku epërsia ka kaluar sa nga njëra skuadër në tjetrën, por që në fund ka qenë për turqit. Në ekuilibër, 1-1, është dhe seria e ndeshjeve mes këtyre dy skuadrave.
CSKA-ja e Moskës kryeson 2-0 ndaj spanjollëve të Baskonia Vitoria Gasteiz. Moskovitët kanë fituar ngushtë, 84-82, në ndeshjen e dytë, me shpresën që ta sigurojnë kualifikimin që në takimin pasardhës, këtë herë në Spanjë. /tesheshi.com/
