Në prani të rreth 13.000 mbështetësve në “Ülker Arena”, Fenerbahçe fitoi mbrëmë ndaj kampionëve në fuqi të Euroleague-s, CSKA-së së Moskës.
E përfunduar 77-71, ndeshja ishte një përsëritje e finales së sezonit të shkuar. Me nivelin në rritje të vazhdueshme, kjo ishte fitorja e katërt radhazi për ekipin e famshëm të Stambollit, që si synim kryesor ka fitimin e aktivitetit.
Ekpe Udoh, i kthyer nga dëmtimi, ishte shënuesi më i mirë për pritësit në këtë takim të javës së 21-të të sezonit të rregullt, me 15 pikë. Bogdanovic e Datome do të shënonin po ashtu përkatësisht nga 12 e 10 pikë.
CSKA-ja mund të ngushëllohet se pati shënuesin më të mirë të lojës, De Colo, me 23 pikë.
Në dy dhjetëminutëshat e parë të ndeshjes kishte një epërsi të lehtë të skuadrës moskovite. I treti dhjetëminutësh do të shënonte kthesën e plotë të vendasve, që me një mbrojtje karakteristike të fortë i çuan shifrat në 60-51, për ta fituar më pas tërë takimin.
Fenerbahçe ka tani një rekord prej 14 fitoresh dhe 7 humbjesh, me një diferencë të vogël ndaj CSKA-së dhe Olimpiakosit që i paraprijnë në renditje, me 15 fitore e 6 humbje.
“Dua së pari të falënderoj tifozët. E mbështetën ekipin në mënyrë fantastike. Ishte një ndeshje shumë e rëndësishme për ne. Luajtëm mirë përveç dy minutave të fundit të pjesës së parë. Mbrojtëm shumë mirë në çerekun e tretë për ta ndryshuar lojën. Po luftojmë nga sekonda e parë në të fundit, sepse në zemrën tonë ka dashuri për Fenerbahçen,” deklaroi Obradovic, trajneri i skuadrës turke, pas ndeshjes.
Kryesuesit e Realit të Madridit e luajnë sonte takimin e tyre të kësaj jave. Baskonia Vitoria Gasteiz është sfiduesi i mbrëmjes; një ndeshje në fushë kundërshtare për madrilenët. /tesheshi.com/
