Dy finalistët e sezonit të shkuar në Euroleague i kanë mbyllur shpejt hesapet me kundërshtarët në playoff, duke i fituar 3-0 seritë e ndeshjeve të tyre e duke u bërë pjesëmarrësit e parë të Final Four-it për këtë sezon.
Fenerbahçe e fitoi dhe takimin e tretë ndaj Panathinaikosit, këtë herë në Stamboll, ndryshe dy sfidave të para, të luajtura në kryeqytetin grek.
Në “Fenerbahçe Ülker Sports Arena”, në prani të rreth 13.000 mbështetësve, skuadra turke e mposhti 79-61 atë greke, duke arritur për herë të tretë radhazi në tre sezone në Final Four. Aty ku do të luhen finalet, në Stamboll, Fenerbahçe do të kërkojë ta fitojë për herë të parë trofeun, çka do të ishte dhe një kulm për vetë basketbollin turk, në rritje të shpejtë gjatë viteve të fundit.
Baskonia Vitoria Gasteiz priti CSKA-në me shpresën se do t’ia dilte ta mposhtte, por në një ndeshje tepër të luftuar, moskovitët ngadhënjyen 88-90, duke e mbyllur serinë e playoff-it me tre fitore e duke shkuar në Final Four për herë të 14-të në 15 sezone.
CSKA e Moskës do të ketë mundësinë ta fitojë për herë të tetë trofeun e Euroleage-s, e gjithashtu ta mbrojë titullin për herë të parë në historinë e saj.
Ndryshe qëndron puna me dy çiftet e tjera të playoff-it, ku barazpesha e deritanishme, me serinë në pozitat 1-1, do të prishet këtë mbrëmje, kur të luhen ndeshjet e treta.
Të dy takimet do të luhen në Stamboll, aty ku Darushafaka pret Realin e Madridit, e Anadollu Efes pret Olimpiakosin. Sfida e parë i përket orës 20:15; e dyta do të luhet më herët, në 18:30. /tesheshi.com/
