Raportuesi i Parlamentit Evropian për Maqedoninë, Ivo Vajgëll demanton të ketë thënë se “Nikolla Gruevski u ka thënë atyre se do të shkojë deri në fund, ngase nuk dëshiron që të shkojë në burg”. Në një prononcim për MIA-n, Vajgëll ka thënë se ai si njeri asnjëherë nuk e personifikon përgjegjësinë dhe nuk përzihet në politikën e Maqedonisë duke përmendur emra dhe njerëz.
“E kam thënë edhe më herët, Maqedonia duhet ta përjetojë pastrimin e politikës së saj dhe rruga për më tutje është edhe ajo çfarë po e bën Prokuroria Speciale. Nëse vërtetohet nëpërmjet gjyqësorit se ekziston ndonjë përgjegjësi individuale e cilitdo qoftë, atëherë ai do të kuptoj se në shtet juridik duhet të bart pasojat”, ka thënë Vajgëll.
Gjatë ditës së sotme agjencia e lajmeve “Anadolu” publikoi një pjesë të deklaratës së eurodeputetit Ivo Vajgëll, gjoja se ai e ka pranuar që lideri i VMRO-DPMNE-së, Nikolla Gruevski iu ka thënë ndërkombëtarëve se nuk do të dorëzohet ta lëshojë pushtetin, pasi që i trembet burgut. /tesheshi.com/
