Euroambasadori Samuel Zhbogar sot tha se qëndrimi i BE-së në lidhje me ekzistimin e Prokurorisë Speciale Publike dhe mandatit të saj në Maqedoni është i pandryshuar, gjegjësisht se duhet t’i jepet hapësirë që ta kryejë punën.
“Mendoj se pozicioni ynë është ashtu sikur në fillim. Prokuroria Speciale ishte formuar me një qëllim, e ajo është për ta përcaktuar përgjegjësinë e cila del nga skandali i materialeve të përgjuara dhe për atë PSP-së duhet t’i jepet hapësirë dhe kohë që ta finalizojnë”, tha Zhbogar sot në një vizitë të tij në qytetin e Strumicës.
Vazhdimi i mandatit të Prokurorisë Speciale ishte njëra ndër pikat kryesore të mosmarrëveshjes ndërmjet partive politike VMRO-BDI për formimin e qeverisë.
Nga VMRO kanë dalë me qëndrim publik kundër kësaj prokurorie duke e cilësuar atë si politike dhe subjektive pasi pretendon se po heton vetëm rastet kundër funksionarëve të saj. /tesheshi.com/
