Zvicra bën mrekullinë duke përmbysur Slloveninë në kohën shtesë të ndeshjes, (3:2). Tre gola në 14 minuta i japin shtytjen përfaqësueses helvete deri sa Sllovenia e lëshon mundësinë e fundit për të arritur objektivin, ‘Francë 2016’. Synim ky të cilin Anglia e arriti pas triumfit ndaj San Marinos me shifra tenistike 6:0. Falë fitores ndaj Lituanisë (1:0), tashmë është Estonia ajo që i futet “valles” për të shkuar në ‘EURO 2016’.
Tabelën në Grupin E, e kryeson Anglia me 21 pikë, që ndiqet nga Zvicra me 15 sosh. Tashmë Estonia “stacionohet” në pozitën e tretë me 9 pikë. Në dy pozitat e fundit dhe pa asnjë gjasë për t`u kualifikuar tutje mbeten Lituania që ka vetëm 6 pikë dhe San Marino mbetet me 1 pikë nderi.
Edhe në Grupin C, situata tashmë është qartësuar. Spanja fiton ndaj Sllovakisë (2:0) dhe merr udhëheqjen e grupit. Në fakt dy përfaqësueset respektive kanë nga 18 pikë. Ukraina mposht Bjellorusinë (3:1) dhe e largon nga “loja”. Luksemburgu fiton derbin e të autsajderëve përballë Maqedonisë (1:0).
Në Grupin G, Austria bën detyrën përballë Moldavisë (1:0) dhe vazhdon të kryesojë renditjen me 19 pikë. Ndërkohë Rusia ka fituar derbin me Suedinë (1:0) dhe ka rihapur luftën për pozitën e dytë ndërmjet këtyre dy shteteve. Mali i Zi ka mposhtur Lihteshtejnin (2:0) për ta kaluar në klasifikim por pa ndonjë rendiment që do t`i hynte në punë ballkanasve. /tesheshi.com/
