Qeveria franceze të dielën, njoftoi për ndalimin e përdorimit të alkoolit përreth stadiumeve dhe zonave të tifozëve, pas shpërthimit të dhunës gjatë tri ditëve të kaluara në disa qytete të Francës.
Marseille në veçanti ka qenë skenë e shumë incidenteve, në të cilat janë përfshirë tifozë të dehur nga Anglia dhe Rusia, si dhe francezë lokal në dhe përreth stadiumit, ku është zhvilluar ndeshja hapëse e grupit B.
“Kam kërkuar që të ndërmerren të gjitha masat e nevojshme për ndalimin e shitjes, konsumimit dhe transportin e pijeve alkoolike në vendet e ndjeshme, në ditët e zhvillimit të ndeshjes, një ditë para ndeshjes dhe gjatë ditëve kur zonat e tifozëve janë të hapura”, ka thënë ministri i Punëve të Brendshme Bernard Cazeneuve.
Këto masa të reja, të ashpra vijnë pas ngjarjeve të mbrëmjes së të shtunës në qytetin Marseille, ku përleshjet në mes të tifozëve të Anglisë dhe Rusisë lanë të lënduar më shumë se 30 njerëz dhe shtynë UEFA-n që të hapë procedurë disiplinore kundër Unionit të Futbollit të Rusisë.
UEFA ka paralajmëruar edhe Anglinë edhe Rusinë se nëse vazhdon dhuna, të dyja ekipet do të ballafaqohen me skualifikim nga kampionati. /tesheshi.com/
