Ndonëse kanë kaluar dhjetë ditë nga vdekja e aktivistit të Lëvizjes “Vetëvendosja”, Astrit Dehari, motivet janë ende në kufinjtë e paqartësisë. Për këtë arsye, në hetime është përfshirë edhe EULEX-i, nën cilësinë e monitoruesit. “EULEX- i është duke monitoruar rastin, që është përgjegjësi e autoriteteve të Kosovës”, është komentuar shkurt nga zyrtarët e këtij institucioni.
Mësohet se në ditën kur trupi i pajetë i Deharit, i është nënshtruar autospisë, përveç mjekëve dhe përfaqësuesve të familjes së tij, prezentë ishin edhe ekspertë të EULEX-it.
Lidhur me këtë ngjarje, edhe ministrja e Drejtësisë, Dhurata Hoxha garantoi transparencë të plotë për zbardhjen e ngjarjes misterioze.
Mësohet se në fund të kësaj jave pritet të dalin edhe rezultatet e autopsisë. Astrit Dehari vdiq të shtunën e kaluar më 5 nëntor në rrethana të paqarta. Ai ndodhej në paraburgim, i dyshuar si autor i sulmit me granata-hedhës, në ndërtesën e Kuvendit të Kosovës më 4 gusht./tesheshi.com
