Misioni i Bashkimit Evropian për sundimin e rendit dhe ligjit në Kosovë (EULEX), ka dështuar sërish sa i përket hetuesisë së veçantë në rastin e ish-deputetit të PDK-së, Azem Syla dhe bashkëpunëtorëve të tij.
Të gjitha seancat e caktuara për datën 6, 7 dhe 8 korrik 2016 janë anuluar. Një gjë të tillë e ka konfirmuar Tomë Gashi, avokati i Sylës.
“EULEX-i nuk jep sqarime për këto shtyrje, por dihet se ky organizëm ende nuk ka mandat në Kosovë. EULEX-i duhet që të gjitha lëndët t’i dorëzojë tek gjyqtarët dhe prokurorët vendorë, sepse askund në botë misionet e sundimit të ligjit nuk i mbajnë lëndët në sirtarë”, ka deklaruar Gashi.
Pasi që EULEX-i nuk mund të veprojë, sipas Gashit, ata që janë në paraburgim nuk mund t’i realizojnë të drejtat e tyre dhe askush nuk ka të drejtë që t’i mbajë në paraburgim duke mos kryer asnjë veprim hetimor.
“EULEX-i është këtu që të na mësojë apo imponoëj rregullat e sundimit të ligjit, por ne po e këshillojmë EULEX-in, se pasi nuk ka mandat për të vepruar, t’i dorëzojë lëndët tek gjyqtarët dhe prokurorët e Shtetit. Posaçërisht, kur të dyshuarit e EULEX-it si Azem Syla dhe të tjerët janë në paraburgim, rregulla e parë e drejtësisë është: ‘Kur nuk mund të veprosh vetë, lejoj të tjerët të veprojnë në interes të drejtësisë’”, ka deklaruar Gashi, në përpjekjen e tij për të intepretuar dhe zgjidhur ngërçin e krijuar mes EULEX-it dhe klientit të tij. /tesheshi.com/
