Ndonëse Fondi Monetar Ndërkombëtar përmes përfaqësuesit rezident në Kosovë, Ruud Vermeulen ka kërkuar nga partitë politike të mos premtojnë rritje të pagave, pasi të gjitha zotimet fiskale dhe veprimet përkatëse duhet të jenë në përputhje me rregullën fiskale dhe ligjin për pagat e sektorit publik, kjo nuk e ka penguar aspak kreun e PDK-së Kadri Veseli, që në një takim të mbajtur me përfaqësuesit e bizneseve të premtojë rritje pagash deri në 30 %.
Veseli ka shtuar se bashkë me partnerin e tij në koalicion dhe kandidatin për kryeministër të koalicionit PDK-AAK-Nisma, Ramush Haradinajn, do ecin drejt zhvillimit.
“Së bashku me Ramushin kryeministër të Kosovës dhe me partneritetin tonë të përbashkët, do t’i lëvizim gjërat, unë dhe ai, bashkërisht, do t’i lëvizim gjërat për mirë”, ka deklaruar Veseli.
Kujtojmë se rritje pagash premtoi edhe Isa Mustafa pak para se të rrëzohej qeveria, çka ngjalli reagime të shumta duke e quajtur një premtim për vota.
Dhe e gjitha kjo duhet kuptuar në kuadër etheve të fushatës elektorale, ku premtimet marrin dhenë duke kaluar ndonjëherë çdo cak. /tesheshi.com/
