Ethet e para të fushatës elektorale sapo kanë nisur të ndihen në Kosovë. Sinjali i parë është dhënë me tezën e njohur të Kosovës si “Zvicra e Ballkanit”, e cila është bërë shkak për ironi therrëse të kreut të AKR-së, Pacolli kundrejt kandidatit për kryeministër, kreut të PDK-së, Veseli.
Ky i fundit ka premtuar se Kosovën e pret një e ardhme pikërisht si ajo e Zvicrës – duke aluduar këtu veten e tij në krye të vendit që do e mundësonte një gjë të tillë, ndërsa Pacolli ia ka kthyer duke i thënë se vetëm pa të në pushtet Kosova mund ta kishte këtë fat.
“Z. Kadri Veseli paska thënë që Kosova do të bëhet “Zvicra e Ballkanit”. Perfekt, e besueshme, po, do te bëhet sapo të dalni ju në OPOZITË. Na priftë e mbara!” (sic.), ka shkruar Pacolli në profilin e tij në FB.
Në këtë zgjedhje, ky i fundit tenton të rifutet sërish si faktor në politkën e ditës, status që e ka humbur vitet e fundit që kur nuk mundi dot ta mbajë Presidencën kosovare pas një vendimi të Gjykatës Kushtetuese.
Edhe një figurë nga partia e tij që e pati në pushtet, kreun e komunës së Gjakovës, Mimoza Kusari Lila, nuk e gëzon më, pas inkuadrimit të kësaj të fundit në një parti të re. /tesheshi.com/
