Nga Blendi Gashi
Autoritetet e drejtësisë kosovare i kujtuan prangat së fundi Etem Arifit, kreun e Ashkalinjve, duke i ngritur kuzën për korrupsion. I ngjan ky rast atij të Spiro Kserës në Shqipëri, që edhe pse ministër, u duk se u bë kurban për ata dhjetra peshq të mëdhenj që nuk i prek dot kush.
Sepse, edhe pse Ksera mund të ketë abuzuar me financat, gjë e cila e çoi pas hekurave dhe që tanimë po vuan dënimin, nuk ishte ai i pari që duhej ta kishte këtë fakt. Kështu dhe me Arifin e gjorë të ashkalinjve të Kosovës.
Dhe janë pikërisht këto raste që jo vetëm nuk gëzojnë askënd, nga ajo mase e madhe njerëzish të thjeshtë që duan të luftohet korrupsioni gërryes, si në Shqipëri e si në Kosovës, por që dëshpërojnë më së shumti pasi duken si një hy syve publikut, sikur janë akte që bëhen më kast për të fshehur aferat e mëdha dhe të mos i trazuar peshqit e mëdhenj që notojnë në ujrat e qelbura të zhvatjes.
“Nuk mungon hetimi por ndëshkimi”
Organizata që monitorojnë punën e gjykatave dhe prokurorive thonë se është tejet shqetësuese mos gjykimi i asnjë zyrtari të lartë për korrupsion.
Ehat Miftaraj, nga Instituti i Kosovës për Drejtësi (IKD), thotë se vitet e fundit nuk ka munguar hetimi apo ndjekja penale nga ana e prokurorëve vendore kundër zyrtarëve të lartë shtetërorë në Kosovë, por që fatkeqësisht në fund nuk kanë dhënë ndonjë rezultat.
“Fatkeqësisht në shumicën e rasteve të tilla procedura penale ndaj individëve të përfshirë në afera korruptive të nivelit të lartë ka përfunduar me ngritje të aktakuzës, duke mos arritur që këto aktakuza të finalizohen me aktgjykime dënuese dhe me konfiskim të pasurisë së fituar me vepër penale. Mos finalizimi i rasteve të tilla me aktgjykime dënuese, në praktikë po ndikon në amnistimin e tyre dhe me këtë edhe pastrimin e figurave të larta publike dhe shtetërore për dyshimet për korrupsion”, thotë Miftaraj, për tesheshi.com.
Lumezi s’tregon profilet e zyrtarëve të lartë që janë nën akuza
Portali tesheshi.com gjatë ditës ka tentuar të marrë përgjigje edhe nga Prokuroria e Shtetit, por zëdhënësja Lirodona Kozmaqi, nuk është përgjigjur në pyetjet e dërguara, një prej të cilave është se sa zyrtarë të lartë të shtetit këtë vit janë hetuar nga prokuroria për korrupsion?
Muaj më parë kryeprokurori, Aleksandër Lumezi, ka bërë të ditur se janë mbi 33 raste të korrupsionit dhe krimit të organizuar të nivelit të lartë, përfshirë edhe nivelet ministrore që po shqyrtohen nga Prokuroria e Shtetit.
Lumezi tha se gjysma nga 33 rastet janë ngritur akuzat (konkretisht 19 akuza), në mesin e të cilëve edhe zyrtarë të lartë shtetërorë.
Por kreu i akuzës në Kosovë nuk bëri me dije profilet e sakta të atyre që janë nën akuza, por tha se i mbetet gjykatave që të vendosin përfundimisht për këto raste, duke thënë “se pret nga gjykata që këto lëndë t’i trajtojnë me prioritet”.
Por, kjo pritje e Lumezit nuk është hetuar se lëndët e zyrtarëve të shtetit vazhdon t’i mbulojë pluhuri dhe drejtësia kosovare po tregon se nuk është e interesuar të hetojë “të fortit”, e politikës.
Ndryshe, rezultatet konkrete në luftën kundër korrupsionit dhe krimit të organizuar, sidomos të nivelit të lartë, tashmë janë shndërruar në kusht për Kosovën nga ana e Komisionit Evropian, për liberalizim të vizave. /tesheshi.com/
