Nga Bashkim Kastrati
Eshtrat e Heroit Kombëtar Isa Boletini dhe bashkëluftëtarëve të tij janë nisur nga lagja Boletini që ndodhet që disa vite në fshatin Veriq të Komunës së Istogut.
Me rastin e nisjes së eshtrave të heroit për në kazermën e FSK-së në Mitrovicë, është mbajtur një ceremoni rasti, ku kanë marrë me dhjetëra qytetarë, të cilët kishin ardhur për të nderuar figurën e Isa Boletinit dhe bashkëluftëtarëve të tij dhe për të dhënë përkrahjen për rivarrimin e eshtrave të Isa Boletinit në fshatin e tij të lindjes në Boletin.
Familjarët u shprehen të gëzuar që më në fund po realizohet rivarrimi i heroit me ceremoni shtetërore dhe që Isa do të pushojë në vendlindjen e tij, ku tash e një kohë të gjatë e ka pasur varrin e hapur.
Ndërkohë sot në ambientet e Kuvendit të Kosovës u mbajt konferenca shkencore “Isa Boletini në Lëvizjen Kombëtare Shqiptare”. Të pranishëm ishte kryetari i Kuvendit të Kosovës Kadri Veseli, Ministri i Forcës së Sigurisë Haki Demolli, Ambasadori i Shqipërisë në Kosovë Qemal Minxhozi.
Kryetari i Kuvendit të Kosovës ka thënë se Isa Boletini jetoi dhe veproi në një periudhë dramatike të historisë sonë kombëtare. Ishte periudhë e kthesave të mëdha historike. Sundimi shekullor osman po kalonte vitet e fundit të tij dhe shqiptarët po përballeshin me një sfidë radikale: ose do të dilnin nga ky sundim si një komb i formuar dhe me aftësi shtetformuese, ose rrezikonin shpërbërjen kolektive, si etni dhe territor.
“E gjithë veprimtaria e Isa Boletinit ishte një përballje me këtë sfidë. Ishte një përballje titanike, e cila e çoi atë nga betejat e grykave të Kosovës, në mbrojtjen e pavarësisë kombëtare të shpallur në Vlorë, e prej andej në zyrat diplomatike të Evropës’, ka thënë Veseli.
/tesheshi.com/
