Presidentja e Kosovës Vjosa u ka takua të martën me të dërguarin amerikan në rajon, Gabriel Escobar, ku siç njofton Presidenca e Kosovës, mes tyre është diskutuar për zhvillimet e fundit, me theks të veçantë për Veriun e Kosovës.
Osmani theksoi se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqen dhe stabilitetin në vend dhe rajon.
Ajo theksoi se prioritet i institucioneve të Kosovës është zbatimi i ligjit dhe se në këtë kontekst vendimet e institucioneve të Kosovës janë në përputhje me Marrëveshjet e Brukselit për lirinë e lëvizjes dhe nuk janë të drejtuara kundër asnjë komuniteti.
Institucionet e Kosovës janë në komunikim dhe koordinim të vazhdueshëm me partnerët ndërkombëtarë dhe çdo vendim i tyre pasqyron frymën kushtetuese të vendit dhe vlerat demokratike.
Eskobarit të mërkurën do t’i bashkohet edhe i dërguari special i Bashkimit Evropian për dialogun ndërmjet Serbisë dhe Kosovës, Miroslav Lajçak.
Vizita e Escobar-it dhe Lajçakut në Prishtinë, pas së cilës të enjten do të qëndrojnë edhe në Beograd, pasoi takimin e pasuksesshëm mes Kurtit dhe presidentit serb Aleksandar Vuçiq javën e kaluar në Bruksel.
Ai takim u organizua në përpjekje për të gjetur një zgjidhje pas bllokadave të rrugëve në veri të Kosovës nga serbët, për shkak të vendimit të Qeverisë së Kosovës për vendosjen e reciprocitetit në kufi.
Pas tensioneve në veri të Kosovës më 31 korrik, qeveria e Kosovës, në konsultim me partnerët ndërkombëtarë, në radhë të parë me SHBA-në, e shtyu zbatimin e masave deri më 1 shtator. /tesheshi.com/
