Ernst Reichel, i ngarkuar i Ministrisë së Jashtme gjermane për Ballkanin Perëndimor ka folur për demonstratat, dhunën, zgjedhjen e Thaçit për president, zgjedhjet e reja.
Ai ka thënë se ka përshtypjen se opozita gjendet në një rrugë të gabuar.
“Ne këtu në Gjermani dhe në bashkësinë ndërkombëtare jemi të shokuar me dhunën e cila po përhapet në Kosovë, pra edhe për dhunën në fundjavën e kaluar gjatë demonstratave të opozitës. Ajo që shqetëson edhe më shumë është që opozita nuk është distancuar qartë nga kjo dhunë. Ne kemi përshtypjen se opozita gjendet në një rrugë të gabuar, nga e cila duhet të kthehet sa më parë. Ne jemi të bindur se kemi nevojë që të kthehemi në rrugën demokratike, ku mund të zhvillohet një debat demokratik për mendimet dhe qëndrimet e ndryshme. Debati duhet të zhvillohet në parlament me argumente dhe jo me gaz lotsjellës apo koktej Molotov”, ka thënë ai në një intervistë dhënë për DW.
Sipas tij zgjidhja e vetme është rruga e kthimi i opozitës në rrugën parlamentare, derisa nuk mendon se zgjedhjet e reja janë zgjidhje.
Kurse, sa i përket zgjedhjes së Thaçit president, Reichel ka deklaruar se zgjedhja e presidentit është pjesë marrëveshjes për krijimin e koalicionit ndaj mendon se kjo edhe do të ndodhë.
/tesheshi.com/
