Kur kanë mbetur dhe pak orë nga skadimi i afatit kushtetuesem për formimin e qeverisë së re nga fituesi VMRO, e ndërsa pritet përgjigja historike e BDI-së nëse do koalicionojë me të apo LSDM-në e dalë e dyta në zgjedhje, vjen dhe ngacimi i një ish-politikaneje me emër në partinë e Ali Ahmetit, Ermira Mehmeti dora vetë, e cila kohë më parë shpalli daljen nga kjo parti, një tip “arratisjeje” nga politika e Shkupit, për t’u angazhuar gjetkë në Europë me një detyrë tjetër.
Ajo ka përcjellë një status në FB, që, edhe pse i paqartë deri diku, lexohet si një mesazh që partia e saj duhet t’a vijojë koalicionin me Gruevskin.
“Në fakt, BDI-së nuk i nevojitet gjithë kjo e ashtuquajtur analizë për të vendosur partnerin për qeveri. Mjafton ta kishte analizuar rezultatin e zgjedhjeve”, ka shkruar Mehmeti, duke u riangazhuar pra politikisht në këto orë të tendosura.
Mehmeti u largua nga BDI jo thjesht nga incidenti i saj me bashkëpartiakun Musa Xhaferi, teksa i publikuan një bisedë audio me të ku dalloheshin notat erotike; por dhe nga pakënaqësitë ndaj stilit drejtues e qeverisës. Gjithsesi, mesazhi i saj flet qartë se ajo, edhe pse fizikisht nuk është më në BDI, si “emocion politik” vazhdon të jetë pjesë e saj. /tesheshi.com/
