Erion Veliaj do të japë të enjten dorëheqjen nga detyra e ministrit të Mirëqenies Sociale dhe Rinisë, për t’iu përkushtuar më pas plotësisht garës për Kryeqytetin. Por, para se t’i dorëzojë Kryeministrit aktin e dorëheqjes nga detyra, Veliaj për herë të fundit në cilësinë e Ministrit do marrë pjesë në seancën plenare, ku pritet të diskutohet dhe miratohet projektligji i shumëdebatuar i hapjes së dosjeve të ishSigurimit të Shtetit.
Bëhet fjalë për një nga ligjet që ka ngrënë më shumë debat këto muajt e fundit dhe që parashikon hapjen e dosjeve sipas modelit të suksesshëm gjerman të
transparencës së dosjeve të STASIt dhe i vlerësuar nga partnerët ndërkombëtar si varianti i duhur. Veliaj do ta mbrojë vetë këtë nismë ligjore para Kuvendit, duke konsideruar miratimin e tij edhe si një sfidë të tijën personale, si një përpjekje për kompensimin moral të përndjekurve politikë të rregjimit komunist.
Më pas, në orën 16.00 pasdite, Veliaj do të zhvillojë edhe një takim të fundit me stafin e Ministrisë së Mirëqenies Sociale dhe Rinisë, në ambientet e Muzeut Kombëtar.
