Turqia mbetet një prej vendeve rajonale me zë të fuqishëm në mbështetje të Katarit dhe të zgjidhjes së shpejtë së krizës së shpërthyer mes këtij vendi dhe disa shteteve të Gjirit e më tej.
President turk, Rexhep Tayyip Erdogan, shfrytëzoi një ditë më parë një fjalë të mbajtur në grupin parlamentar të partisë së tij, AKP-së, për të shprehur përsëri shqetësimin për zhvillimet e fundit.
Ai e quajti izolimin e Katarit një akt jonjerëzor dhe kundër vlerave islame, duke i kërkuar Arabisë Saudite të luajë një rol udhëheqës në zgjidhjen e krizës.
“Një gabim shumë i rëndë po bëhet me Katarin. Izolimi i një populli në të gjitha fushat është jonjerëzor dhe kundër vlerave islame. Eshtë si të jetë dhënë një vendim me vdekje për Katarin.”
“Mbreti i Arabisë Saudite,” ka nënvizuar Erdogani në fjalën e tij, “si udhëheqësi i Gjirit, duhet ta zgjidhë këtë çështje. Mendoj posaçërisht se ai duhet ta udhëheqë rrugën drejt zgjidhjes së kësaj krize.”
Vetëm një ditë pas kësaj fjale, ministri i Jashtëm turk viziton Katarin; një vizitë në kuadër të rolit ndërmjetësues të Turqisë për zgjidhjen e krizës.
Mevlyt Çavushogllu do të ketë takime në Doha me emirin e Katarit, si dhe me homologun e tij.
Shefi i diplomacisë turke bëri të ditur se mund ta vizitonte dhe Arabinë Saudite, për çka pritej dhe një konfirmim nga pala saudite. /tesheshi.com/
