Presidenti turk ka shfrytëzuar një konferencë shtypi me anëtarët kroatë dhe boshnjakë të presidencës së Bosnjë-Hercegovinës për të deklaruar se tërheqja e trupave turke nga Iraku është jashtë çdo diskutimi, e se ato janë atje si pjesë e një misioni stërvitor.
Në krah të Bakir Izetbegoviçit dhe Dragan Çoviçit, Erdogani ka bërë të ditur se dislokimi i trupave turke daton që prej vitit 2002, e se trupa shtesë janë dërguar një vit më parë, në 2014-ën, në përgjigje të kërkesës së bërë nga vetë kryeministri irakian, Hajdar Ebadi.
“Trupat turke në Mosul nuk janë si luftuese, por janë si stërvitëse,” ka nënvizuar presidenti turk. “Numri i tyre mund të ndryshojë në varësi të madhësisë së trupave kurde peshmerga. Tani për tani nuk diskutohet tërheqja e tyre.”
Erdogani nuk ka lënë pa e komentuar dhe propozimin rus që Këshilli i Sigurimit i OKB-së të lëshojë një deklaratë kundër dislokimit të trupave turke, “Këshilli i Sigurimit e hodhi poshtë propozimin… Turqia ka zgjedhur të bashkëpunojë me koalicionin ndërkombëtar kundër ISIS-it.”
Ai ka kujtuar se vendi i tij ndan një kufi të gjatë me Irakun e Sirinë, dhe se gjendja aktuale në këto vende fqinje ka një rëndësi jetike për Turqinë. Rusia duhet ta shpjegojë praninë e vet në Siri, sepse nuk ka kufi të përbashkët as me Sirinë, e as me Irakun, u ka thënë gazetarëve Erdogani. /tesheshi.com/
