Presidenti turk, në përpjekje masive për gjetjen e një zgjidhjeje për krizën që ka në qendër Katarin dhe ndërprerjen e marrëdhënieve diplomatike të një numri vendesh me të, ka shfrytëzuar mbrëmjen e së martës një iftar për të shprehur këndvshtrimin e tij mbi çështjen.
Për Erdoganin, sanksionet ndaj Katarit nuk janë zgjidhja e duhur, gjë të cilën ai e shprehu në fjalën e tij.
“Dua të them në krye të herës se sanksionet ndaj Katarit nuk i gjejmë me vend,” u tha presidenti të pranishmëve në iftarin e shtruar në Ankara.
“Në një kohë kur ne kemi nevojë më shumë se kurrë për solidaritet dhe bashkëpunim, këto zhvillime në rajon nuk janë në të mirë të asnjë vendi,” ka nënvizuar më tej Erdogani në lidhje me krizën më të fundit rajonale, që ka tronditur thellë dhe atë pak stabilitet të mbetur.
“Zgjidhja e çështjeve mes vendeve anëtare të Këshillit të Bashkëpunimit të Gjirit përmes dialogut është rruga më e drejtë,” do të thoshte presidenti turk.
Ai e bëri të qartë se marrëdhëniet e vendit të tij me Katarin nuk do të ndikohen nga këto zhvillime.
“Si Turqi, ne do të vazhdojmë t’i çojmë përpara lidhjet me Katarin, si me të gjithë miqtë që na kanë mbështetur në momentet më të vështira.”
Erdogani ka theksuar se përpjekjet për ta izoluar Katarin nuk kanë për të zgjidhur asnjë problem, duke e falënderuar Katarin ndërkohë për gjakftohtësinë e treguar dhe për qasjen konstruktive ndaj krizës. /tesheshi.com/
