Presidenti turk Rexhep Tajip Erdogan ka thënë se anëtarësimi i plotë i Turqisë është “kurimi për problemet kronike” të Bashkimit Evropian.
Turqia, e cila aplikoi për anëtarësim në bllok në vitin 1987, filloi bisedimet e pranimit me BE-në në 2005. Por negociatat ndërmjet dy palëve praktikisht janë ngrirë për vite me radhë, për shkak të marrëdhënieve të tensionuara.
“Një Evropë pa Turqinë do të përballet vetëm me izolimin, dëshpërimin dhe konfliktet civile. Turqia nuk ka nevojë për Evropën. Evropa është ajo që ka nevojë për Turqinë”, tha Erdogan.
“Europa, ku ksenofobia është në rritje dhe partitë neo-naziste janë aq të forta saqë ata janë partnerë të koalicionit, po shkon drejt shkatërrimit të saj”, tha ai, duke iu referuar rritjes së një numri partish të ekstremit të djathtë në zgjedhjet e fundit nëpër pjesë të ndryshme e kontinentit.
“Një Europë që do të vriste parimet e veta me duart e veta do të kishte një të ardhme të errët”, shtoi ai.
Komentet e Erdoganit vijnë mes tensioneve të larta midis BE-së dhe Turqisë.
Zyrtarët turq dhe evropianë kanë qenë në një luftë fjalësh me Ankaranë e cila ka akuzuar anëtarët e BE-së se po mbështesin “terrorizmin” – referuar mosdënimit të grushtit të shtetit në korrik të 2016-ës dhe pozicionimit krah elementëve Gylen gjatë masave ndëshkuese post-grusht – ndërsa politikanët e BE-së pretendojnë për përkeqësim të të drejtave demokratike dhe të njeriut në Turqi.
Në shtator, në një debat televiziv përpara zgjedhjeve parlamentare të Gjermanisë, kancelarja Angela Merkel tha se Turqia “nuk duhet të bëhet anëtare e BE-së”.
Në një samit javën e kaluar në Bruksel, krerët evropianë kërkuan nga Komisioni i BE-së, organi ekzekutiv i bllokut, “të reflektojë nëse do të zvoglojë dhe të riorientojë” paratë për mbështetje para anëtarësimit.
Në vërejtjet e tij, Erdogan u kërkoi udhëheqësve të BE-së të jenë “të arsyeshëm” për çështjet që kanë të bëjnë me Turqinë dhe në ndërveprimet e tyre me Ankaranë.
“Megjithëse ata nuk duan ta shohin këtë, Turqia dhe anëtarësimi i saj i plotë është kurimi për problemet e tyre kronike”.
Turqia dhe BE kanë bashkëpunuar për çështje të tilla si kriza e refugjatëve, siguria dhe lufta e Sirisë, një situatë që duket se i ka bërë disa shtete anëtare hezituese të prishin lidhjet. /tesheshi.com/
