Presidenti turk Recep Tayyip Erdoğan mbërriti në Kahramanmaraş të mërkurën pas një serie tërmetesh me magnitudë të lartë që tronditën 10 provinca ku bëri thirrje për unitet dhe tha se të gjitha burimet e vendit ishin mobilizuar.
Para gazetarëve, Presidenti Erdoğan përditësoi numrin e fundit të vdekjeve në 8 mijë e 574. Ai tha se 49 mijë e 133 persona të tjerë u plagosën dhe 6 mijë e 444 ndërtesa u shembën nga tërmeti.
Turqia ka ndërmarrë veprime me të gjitha institucionet e saj që nga tërmetet vdekjeprurëse të së hënës, shtoi presidenti, duke nënvizuar se të gjitha burimet po përdoren për të ndihmuar njerëzit e prekur.
“Qytetarët tanë nuk duhet të shqetësohen, nuk do t’i lejojmë kurrë të qëndrojnë në rrugë”, tha ai dhe theksoi se viktimat e tërmetit mund të qëndrojnë në hotele të kontraktuara në provincat Antalia, Alanya dhe Mersin.
Erdogan vizitoi epiqendrën e tërmetit me magnitudë 7.7 ballë në Kahramanmaraş. Ndalesa e tij e parë ishte në stadiumin 12 Şubat në qytet, ku janë ngritur tenda për të mbijetuarit. Atje, ai foli me të prekurit nga tërmeti përpara se të mbante një konferencë shtypi. Pritet që presidenti turk më pas të vizitojë provincën e Hatayit.
Tërmetet me magnitudë 7.7 dhe 7.6 ballë, me qendër në provincën Kahramanmaraş, goditën 10 provinca dhe prekën më shumë se 13 milionë njerëz. Turqia është duke mbajtur zi kombëtare shtatëditore pas tërmeteve shkatërruese.
Presidenti tha se Autoriteti i Menaxhimit të Fatkeqësive dhe Emergjencave (AFAD) drejtojnë përpjekjet në bashkëpunim me bashkitë lokale dhe se të gjitha agjencitë përkatëse qeveritare po punonin për t’iu përgjigjur pasojave të fatkeqësisë. Ai vuri në dukje se të gjithë ministrat e kabinetit ishin në zonat e goditura nga tërmeti dhe koordinonin përpjekjet. Ai pranoi se kishte pasur “disa probleme” (si përgjigje) në ditën e parë, por shtoi se asnjë qytetar nuk do të mbetej pas. Ai tha gjithashtu se fillimisht kishte “probleme me rrugët dhe aeroportet” dhe ende disa “probleme të vogla” në lidhje me furnizimin me karburant në zonat e goditura nga fatkeqësia. “Ne jemi në një situatë më të mirë tani (për sa i përket reagimit ndaj fatkeqësive) dhe do të jemi më mirë nesër dhe më vonë,” tha ai.
“Kemi një kapacitet të konsiderueshëm dhomash (në hotele). Nëse qytetarët tanë nuk duan të qëndrojnë në tenda këtu, do t’i akomodojmë në hotele. Aty do t’u sigurohet strehim, ushqim etj. falas. Mund të na ndihmojë gjithashtu (për të akomoduar më shumë njerëz këtu). Puna jonë do të përshpejtohet”, tha ai. Ai shtoi se furnizimi me materiale ngrohëse do të trajtonte problemet e ngrohjes në tenda.
Erdogan gjithashtu i bëri thirrje publikut që të mos bie pre e “provokatorëve”, duke iu referuar lajmeve të rreme në lidhje me tërmetin. “Dua që gazetarët tanë të mos lejojnë (dezinformimin). Është koha për unitet dhe solidaritet,” tha ai.
Presidenti theksoi se do të ndihmohen të gjitha familjet e prekura nga tërmeti dhe kanë ndarë një buxhet të madh. Ai tha se çdo familje do të pajiset me 10,000 TL (530 dollarë).
Ai premtoi “operacione masive strehimi” që do të nisin në 10 provincat e goditura brenda vitit, “ashtu siç bëmë në provincat e tjera ku përjetuam fatkeqësi”. Pas tërmeteve të Elazığ dhe Malatya të vitit 2020, Turqia ndërtoi mijëra shtëpi për të mbijetuarit që humbën shtëpitë e tyre dhe ua dorëzoi pronarëve brenda tre viteve.
Për të mundësuar kryerjen me shpejtësi të operacioneve të kërkim-shpëtimit, Turqia të martën shpalli një gjendje të jashtëzakonshme tre-mujore në provincat e goditura nga tërmeti Adana, Adiyaman, Diyarbakır, Gaziantep, Hatay, Kahramanmaraş, Kilis, Malatya, Osmaniye dhe Şanlıurfa. /Tesheshi.com/
