Ne paralajmërojmë Greqinë të vijë në vete dhe të qëndrojë larg ëndrrave dhe veprimeve për të cilat mund të pendohet, siç bëri një shekull më parë, tha të enjten presidenti turk Rexhep Tajip Erdogan, transmeton Anadolu Agency (AA).
Erdogan ndoqi sot pjesën e dytë të stërvitjes ushtarake “Efes-2022” në terrenin e stërvitjes ushtarake në lagjen Seferihisar, në qytetin perëndimor të Izmirit. Në fjalën e tij, ai trajtoi çështjen e armatimit grek të ishujve në detin Egje.
“Turqia nuk do të heqë dorë nga të drejtat e saj në Detin Egje dhe nuk do të hezitojë të përdorë fuqitë e njohura nga marrëveshjet ndërkombëtare kur bëhet fjalë për armatosjen e ishujve”, tha Erdogan.
Ai tha se Turkiye nuk shkel të drejtat dhe ligjet e askujt, por gjithashtu nuk lejon askënd që të shkelë të drejtat e saj.
“Ne i bëjmë thirrje Greqisë që të ndalojë armatosjen e ishujve me status joushtarak dhe të veprojë në përputhje me marrëveshjet ndërkombëtare”, theksoi Erdogan.
Në këtë drejtim, ai i dërgoi një mesazh të qartë Greqisë:
“Ne paralajmërojmë Greqinë të vijë në vete dhe të qëndrojë larg ëndrrave dhe veprimeve për të cilat mund të pendohet, siç bëri një shekull më parë”.
Ai iu referua gjithashtu një operacioni të mundshëm ushtarak kundër kërcënimit terrorist në Sirinë veriore.
“Ne nuk do të lejojmë krijimin e korridoreve terroriste përgjatë kufijve të vendit tonë, kështu që sigurisht që do të përfundojmë vendosjen e pjesëve të mbetura të linjës sonë të sigurisë”, tha Erdogan, duke shtuar:
“Hap pas hapi, ne jemi të vendosur të mbrojmë kufijtë tanë me një vijë sigurie 30 kilometra të thellë”. /tesheshi.com/
