Presidenti turk Rexhep Tajip Erdogan tha të martën se “çdo sulm ndaj stabilitetit të qeverisë së re siriane ose integritetit të territorit të lashtë sirian do të përballet me popullin sirian dhe me ne”, raporton Anadolu.
Turqia nuk mund të lejojë që Siria të ndahet përsëri, tha Erdogan në një takim të Partisë për Drejtësi dhe Zhvillim (AK) në kryeqytetin Ankara, duke shtuar se “ne nuk mund të lejojmë kurrë që territori sirian të kthehet përsëri në një zonë konflikti”.
“Lutjet dhe bindja jonë janë se Siria, pas 61 viteve të diktaturës Baath dhe errësirës së plotë për 13 vitet e fundit, ka parë ditë të ndritshme”, tha Erdogan, duke shtuar se “populli sirian e ka kurorëzuar kryengritjen e tij fisnike me fitore, duke përmbysur sistemi i shtypjes që zgjati për dekada dhe duke mbrojtur lirinë, të drejtat dhe të ardhmen e tij”.
Erdogan vuri në dukje se vendi i tij do të jetë gjithmonë me refugjatët sirianë, me ata që janë aktualisht në Turqi duke u përgatitur të kthehen në shtëpi. Erdogan tha se do të jetë gjithmonë mbështetës, kudo që të jenë.
“Ne shpresojmë që në pjesë të tjera të vendit (Siri) krerët e organizatave terroriste si ISIS dhe PKK/PYD do të shtypen në kohën më të shkurtër të mundshme”, tha Erdogan.
Ushtria izraelite nisi sulme ajrore në të paktën 250 objektiva në të gjithë Sirinë pas rënies së regjimit të Bashar al-Asad, njoftoi të hënën Radio Ushtarake izraelite.
Ministria e Jashtme turke dënoi të martën Izraelin për shkeljen e një marrëveshjeje të vitit 1974 duke avancuar në territorin sirian.
Dënimi nga Turqia erdhi mes tensioneve të rritura në rajon, me shqetësimet se masa mund të minojë përpjekjet për paqe të qëndrueshme dhe stabilitet në Sirinë e shkatërruar nga lufta. /tesheshi.com/
