Presidenti i Turqisë, Rexhep Tajip Erdogan, i cili ka nisur vizitën në Itali, deklaroi në një intervistë për të përditshmen italiane La Stampa, se “çështja e Jerusalemit nuk është vetëm e muslimanëve, por edhe e të krishterëve”, ndaj kishte ardhur në Romë për të diskutuar me Papa Françeskun.
Presidenti turk, theksoi se ai do të bisedojë me Kreun e Kishës Katolike mbi statusin e qytetit, por shtoi se ai ishte i mendimit që të ruhet status quo-ja, që kishte ardhur pas vite e vite negociatash.
Ndërkaq, Erdogan ka kërkuar nga Bashkimi Europian që të pranojë Turqinë në gjirin e saj sa më shpejt.
“Ne i kemi bërë të gjitha detyrat e shtëpisë që na ka kërkuar Brukseli. Tani i takon BE-së që të bëjë pjesën e saj dhe të na pranojë”.
Në lidhje me operacionin në Afrin, Presidenti i Turqisë tha se “po luftojmë vetëm me terroristët dhe kemi të drejtë për ta bërë atë”.
/tesheshi.com/
