Kancelarja gjermane Angela Merkel ishte sot për vizitë në Ankara, ku u takua me krerët më të lartë të shtetit turk.
Ndërsa janë diskutuar shumë tema në bisedimet dypalëshe, që nga lufta kundër terrorit e gjer te kërkesa turke për Gjermaninë që t’i dorëzojë anëtarët e organizatës terroriste gyleniste FETÖ të strehuar atje, në konferencën e shtypit ka tërhequr vëmendjen diçka tjetër.
Presidenti Erdoğan i ka kujtuar kancelares Merkel se përdorimi i termit “terror islamist” është i gabuar dhe nuk duhet të zërë vend në ligjërim.
“Dua të sqaroj veçanërisht diçka që mund të jetë kuptuar gabim… Termi ‘terror islamist’ është shumë shqetësues për ne muslimanët. Një term i tillë nuk mund të përdoret, nuk është e drejtë,” ka thënë presidenti turk.
“Islami dhe terrori nuk mund të bashkekzistojnë. Kuptimi i fjalës Islam është paqe. Për sa kohë të përdoret ky term, ne do ta kundërshtojmë atë.”
Asnjë vend tjetër nuk po lufton ndaj ISIS-it aq fort sa Turqia, ka sjellë në vëmendje Erdoğan-i në praninë e Merkel-it. Ndërsa shumica e vendeve e kanë dënuar verbalisht ISIS-in, ka vazhduar ai, Turqia, si vend me shumicë muslimane, po e lufton grupin ekstremist. /tesheshi.com/
