Presidenti turk Rexhep Tajip Erdogan u kërkoi të hënën banorëve të provincës Adiyaman për “falje” për mbërritjen me vonesë të ekipeve të shpëtimit, duke qenë se zona në juglindje të vendit ishte ndër më të goditurat nga tërmeti i 6 shkurtit.
“Për shkak të efektit shkatërrues të dy tërmeteve dhe motit të keq, ne nuk mundëm të punonim siç donim në ditët e para të fatkeqësisë në Adiyaman. Për këtë ju kërkoj të më falni”, tha Erdogan gjatë vizitës së tij në Adiyaman.
Kreu i shtetit mbërriti në atë qytet tre javë pas tërmetit që vrau më shumë se 50,000 njerëz në Turqi dhe Sirinë fqinje. Presidenti turk, në pushtet prej 20 vitesh dhe me ambicie për të ruajtur postin e tij pas zgjedhjeve të 14 majit, ka qenë subjekt i kritikave të ashpra për ngadalësinë e vendit në ndihmën ndaj viktimave.
“Aq shumë ndërtesa dhe struktura u shkatërruan sa që për fat të keq nuk ishim aq shpejt sa kishim shpresuar,” tha Erdogan.
Ai pranoi “dështimet” në reagimin ndaj tërmeteve, duke shtuar se ishte “e pamundur të jesh plotësisht i përgatitur për një fatkeqësi të kësaj magnitude”.
Në provincën Adiyaman dhe Hatay, njerëzit shprehën pakënaqësi të madhe me reagimin e qeverisë ndaj fatkeqësisë natyrore. Mehmet Yildirim pohon se 34 orë pas tërmetit të parë nuk ka parë “askënd”, as përfaqësues të shtetit, as policinë apo ushtrinë.
Të hënën, Erdogan premtoi të ndërtojë rreth 50,000 apartamente të reja në Adiyaman. Në total, rreth 309,000 njësi banimi duhet të ndërtohen në 11 provinca të prekura nga tërmetet shkatërruese. /tesheshi.com/
