Nuk ka asgjë islame rreth ISIS-it, dhe është e gabuar politikisht t’i referohesh atij si “shtet islam”, ka theksuar presidenti turk, Rexhep Tajjip Erdogan, në një intervistë televizive mbrëmjen e shkuar.
Të papranueshëm, e ka quajtur ai, bashkëshoqërimin e Islamit me terrorizmin duke u bazuar në veprimet e organizatave terroriste si ISIS-i, dhe ka nënvizuar se ato nuk përfaqësojnë Islamin apo muslimanët.
Në kuadrin vendor, Erdogani e ka përshkruar ISIS-in si një kërcënim të brendshëm dhe të jashtëm për Turqinë. Sipas tij, Turqia ka fuqi të kryejë dhe një ofensivë tokësore kundër ISIS-it. Në të njëjtën kohë, presidenti ka kujtuar se do të vijojnë operacionet kundër terrorit derisa të ketë rezultate konkrete.
Presidenti turk ka folur dhe mbi një sërë çështjesh të tjera në intervistën e tij, si për mënyrën e zgjidhjes së krizës siriane, për sistemin e shumëdiskutuar presidencial në Turqi, dhe për takimin e sapopërfunduar të G20-ës. /tesheshi.com/
