Presidenti turk Rexhep Tajip Erdogan pritet të denoncojë Greqinë në NATO, në samitin e pritshëm të Aleancës, raporton Sabah.
Ankaraja do paraqesë dokumentet e mbledhura që “tregojnë se Greqia po shkel traktatet e Lozanës” duke militarizuar ishujt e Egjeut, ato që për paradoks janë pak milje larg brigjeve turke, ndërkohë që nuk dallohen nga brigjet greke.
Në raportin e gazetës me titull “Zbarkimi me dokumente në Samitin e NATO-s” thuhet konkretisht se presidenti turk do të denoncojë Greqinë para të gjithë anëtarëve të Aleancës për militarizimin e ishujve dhe vizitat e zyrtarëve të lartë në to.
Në veçanti, Sabah flet për “vizita provokuese të zëvendësministrit të Mbrojtjes së Greqisë”, duke theksuar se ato nuk duhet të ndodhin.
Turqia dhe Greqia po kalojnë një periudhë tensionesh mes tyre, edhe pse janë anëtarë të NATO-s, pasi kanë mosmarrëveshje të thella lidhur me ujrat e Egjeut, burimet në to, si dhe pronësinë e ishujve. /tesheshi.com/
