Në deklaratën e përbashkët të Turqisë dhe Arabisë Saudite thuhet se të dy liderët në takim theksuan vendosmërinë e dy vendeve për të nisur një epokë të re të bashkëpunimit gjithëpërfshirës në shumë fusha.
Presidenti turk Rexhep Tajip Erdogan dhe Princi i Kurorës saudite Mohammed bin Salman diskutuan të mërkurën në Ankara një epokë të re bashkëpunimi në marrëdhëniet dypalëshe, duke përfshirë lidhjet politike, ekonomike, ushtarake, të sigurisë dhe kulturorea.
Erdogan e priti Bin Salmanin me nderime shtetërore në kompleksin presidencial në kryeqytetin turk, pas së cilës ata zhvilluan një takim që zgjati rreth dy orë.
Në deklaratën e përbashkët të Turqisë dhe Arabisë Saudite thuhet se të dy liderët në takim theksuan vendosmërinë e dy vendeve për të nisur një epokë të re të bashkëpunimit gjithëpërfshirës në shumë fusha.
Sipas deklaratës, Ankaraja zyrtare dhe Riadi vendosën gjithashtu të thellojnë konsultimet dhe bashkëpunimin për çështjet rajonale me qëllim forcimin e stabilitetit dhe paqes.
Të dy krerët u zotuan të zhvillojnë dhe të ruajnë bashkëpunimin bazuar në “vëllazërinë historike” të dy kombeve për të ardhmen e të gjithë rajonit.
Ata theksuan gjithashtu rëndësinë e rritjes së numrit të fluturimeve, lehtësimin e tregtisë dypalëshe, mundësitë e investimeve me synimin e partneriteteve konkrete.
Në deklaratën e përbashkët thuhet se Arabia Saudite ka shprehur mirënjohjen për mbështetjen e Turqisë për kandidaturën e Riadit për të pritur EXPO 2030.
Në fund të prillit, Erdogan bëri një vizitë pune dy-ditore në Arabinë Saudite për të forcuar marrëdhëniet dypalëshe.
Erdogan më pas u takua me mbretin saudit Salman bin Abdulaziz Al Saud, si dhe me trashëgimtarin e fronit dhe diskutoi një sërë çështjesh ndërkombëtare, rajonale dhe dypalëshe.
Duke u kthyer në Turqi pas vizitës në Arabinë Saudite, Erdogan tha se Ankaraja dhe Riadi janë të vendosur të vazhdojnë përpjekjet për interesa të përbashkëta dhe stabilitet në të gjithë rajonin. /tesheshi.com/
